Rainboots

又要迎接我最討厭嘅季節 ...... 春天 o(︶︿︶)o 
兩個月前我已經有全盤嘅計劃
諗住籌集資金買部強力抽濕機嚟對抗呢個咁潮濕嘅季節
勢估唔到大部份抽濕機已經响冬天尾果陣賣斷市
乜冬天唔係買暖風機嫁咩? 呢鑊擺明玩我姐(￣▽￣)"　
唉 ! 面對呢種 "濕笠笠" 嘅天氣，加上一堆堆冇陽光味嘅衫
對我打擊好大，真係乜 mood 都冇
再加上連續兩星期死唔斷氣嘅雨水
我嘅正能量徹底地被淋熄
垂死掙扎之際，食飯大嘅我總會諗到辦法解決
hahaaaa 就係shopping，抱住要貨唔要錢嘅原則底下
我今日終於帶咗一對雨靴返屋企，亦係我一生人第一對雨靴
其實上年已經蠢蠢欲動想買，但又睇唔啱
好難得俾我睇中呢一對，既然大家情投意合♡♡♡ heheee
話時話，買咗之後我覺得好有使命感 <(￣︶￣)/　　
可以帶動到香港經濟嘅同時，亦拉高咗4月份消費物價指數
一舉兩得 ! 哈哈哈哈哈

別人的故事 - 親情

放復活節假期前，收到一個client嘅電話
Ryan Lee，35歲左右，喺某公司擔當翻譯工作
已經5個月冇聽過佢把聲，有一種久別重逢嘅感覺
我急不及待問佢「你宜家係地球定係喺太空 ?」
我問佢做咩咁突然放咁耐假
佢沈默咗一陣，笑住講「我呢5個月一直陪我爸爸，佢上個月離開咗喇」
Ryan形容同佢同爸爸嘅感情係「淡如水」
兩父子拍埋一齊就好似「正極」同「正極」咁，一拍即彈
好則就口部動粗 (講粗口)，壞則手、口都動粗
佢20歲左右去咗日本留學，上機當日都可以同佢爸爸喺離機大堂嘈一鑊先上機
讀完書返香港，佢因為媽媽嘅關係，每星期都會返家探兩老
但同爸爸嘅關係依舊係都係咁惡劣，每次探佢地，只都打招呼
直至半年前，佢爸爸發現有cancer
佢話有一次去醫院探佢，喺門口聽到佢問姑娘
「姑娘呀，你有冇空氣清新劑或香燻之類嘅嘢 ? 我個仔由細到大都好憎醫院果陣味，佢細個果陣我都可以用糖嚟氹佢姐....」
ryan 聽到呢番說話，個心痛到好似瞓喺釘床一樣
果一刻佢唔夠膽入病房，因為佢覺得自己好醜惡
之後佢即時向公司辭職，想用時間買回呢份親情
幸好佢公司以 "停薪留職" 方式俾佢放假
佢話呢4個幾月每日都陪住爸爸，每日都有講唔完嘅話題
佢笑言呢4個月所講嘅嘢加加埋埋仲多過之前嗰34年
面對死亡，佢爸爸選擇咗用積極嘅態度面對
佢爸爸成日都話「即使我面對死亡，我唔覺得恐懼同黑暗，因為我身邊有兩個太陽」
佢爸爸將佢兩母子形容成太陽
ryan 話佢爸爸去得好安詳，離留果一刻佢同媽媽都陪伴住
唯一遺憾係佢爸爸未能夠睇到 "紀曉嵐" 大結局

聽後感 :
「家家有本難諗的經」好難明白點解ryan對佢爸爸呢種 "恨" 可以咁根深柢固。
最終沈痛嘅代價令佢放低對爸爸幾十年嘅 " 恨"

「哀哀父母，生我劬勞，欲報之恩，昊天罔亟」「樹欲靜而風不息；子欲養而親不在。」
這麼恆常的道理，真的是易明難做嗎？

我仍活著呢

慚愧o(︶︿︶)o  已經有兩個月冇寫blog
放棄了嗎 ? 當然唔會啦，我對寫blog仲懷住滿腔熱誠嫁
只不過寫blog對於我呢種身兼兩職嘅中女媽媽
要每日騰出時間寫blog，確實係好奢侈
但之前收到一個朋友嘅message
佢話「我睇完你嘅blog我會好開心, 你嘅文字可以令我幻想到當時嘅畫面」
呢句說話令我好開心，有一絲感動
有緣見到我個blog嘅朋友仔
留句說話俾我，話我知你都曾經嚟過呢度 hea 過啦