親子游泳班(Round 1) - Lesson 4

日期 : 2010年5月23日 (星期日)

用三個字形容今日嘅結果 ........ "夢一場"
仲要係美夢<(￣︶￣)>　
今朝一如以往，食完早餐後一齊準備游水用品，
我同老公亦冇刻意問靖甄今日去唔去游水，
唯一策略有少少改變，就係喺屋企著咗泳衣先出發，
反而靖甄幾接受呢一套，臉上帶點懵懂但非常合作(￣ˇ￣)
坐車期間我裝作若無其事咁同佢講今日有d 咩嘢節目、
每一項流程係點樣安排，反而冇刻意再叮囑佢 "一陣游水唔好喊" 等等說話
而靖甄亦能概括講出今日要做d 咩，氣氛總算輕鬆o(︶︿︶)o
去到學校，有兩位姐姐向靖甄方向迎面行過嚟，係兩位大約 4-5歲嘅小朋友
兩位都係隔籬line學游水嘅小朋友，所以哋認得靖甄，
靖甄好開心，同佢哋握手打招呼，我見佢心情咁好
即時用眼神向老公示意有d去換衫，而我就繼續陪靖甄同嗰兩位小朋友玩。
見到呢個咁利好嘅形勢，我仲唔打蛇隨輥上咩，上堂鐘聲一響
我都叩爸爸 "嗱嗱林" 帶靖甄跟埋兩位小朋友一齊入去
<(￣︶￣)> BINGO ! 又真係 work 喎 ! 冇喊喎 ! <(￣︶￣)>　
今日嘅課堂編排靖甄同基本班嘅小朋友一齊上堂，一齊學踼水
見靖甄都玩得好開心，無礙同其他小朋友相比之下，靖甄嘅服從性較低
即係原本成班小朋友好有秩序向前行，佢就行行吓 "無啦啦" 打斜行搞破壞
但今日靖甄學踼水姿勢方面進步咗，起碼雙腳有力提起踢 & 夠膽自己試
我見到佢 "兩碌" 豬腿踼吓踢吓，真係好鬼死搞笑(￣﹏￣)
完堂後，我不禁擁抱全身濕透嘅靖甄，同佢講『靖靖今日好叻』
甄靖答我『媽媽 ! 我今日冇喊呀 ! 今日同哥哥姐姐玩踢水，叻叻呀』
我心裡不禁講『I'm so proud of you ! 』

今晚臨瞓前諗  ☞  下星期又會演變成點呢 (￣﹏￣)

第一次去香港迪士尼

日期 : 2010年5月17日 (星期一)

終於一嘗所願帶靖甄去迪士尼喇 ! 大滿足 (￣︶￣)
今次我同老公將呢個計劃保密，因為真係好鬼邪(￣﹏￣)
對上兩次歡天喜地宣佈呢個計劃後總會遇上阻滯，
兩次要臨時取消嘅原因都係因為靖甄病咗o(≧o≦)o
所以我同老公決定靜靜地起革命，唔再事先張揚，
最搞笑係老公.... 佢大顯神婆本色，睇通勝擇日去迪士尼(⊙＿⊙)　
今朝起身，同靖甄講『爸爸媽媽帶你去一個新地方玩』
靖甄點頭話『好! 新嫁、我未去過嫁 !』
為咗避開上班呢段繁忙時間，我哋大約10:00am先起程
但計算錯誤囉(￣▽￣)"　呢個鐘數都好Q多人
我哋排除萬難好辛苦先到達迪士尼，
數口精嘅我當然選擇買 annual pass，去兩次就返晒本(￣ˇ￣)

爸爸排隊買annual pass 果陣，靖甄已經好心急想衝入場(￣▽￣)"　
幸好果度d職員送咗幾張貼紙俾佢安撫吓佢，
入場之前briefing 靖甄要聽話、唔好亂走、要拖實爸爸媽媽....等等
一入場︽⊙＿⊙︽　Mickey & Minnie 已經開始同人影相
人龍好長呀≡(▔﹏▔)≡ 我負責排隊，
而爸爸就負責帶靖甄企响涼亭度睇住Mickey & Minnie
唉 ! 靖甄超級興奮，無他，而出娘胎後，除咗家庭成員外
迪士尼嘅所有人物同靖甄由細已經建立深厚嘅感情
爸爸同我講，話靖甄好癲，佢不斷叫 『Mickey & Minnie 來嚟啦 』
見到Mickey & Minnie 攬住其他人影相，靖甄大叫『唔好攬住呀』
可能Mickey見到呢位粉絲咁熱情，Mickey 都住動行過靖甄度3次同佢玩 heheee
排咗半個鐘有多，終於到我哋喇<(￣︶￣)> 靖甄搶閘飛撲去Mickey & Minnie 度
嘩 ! 怕羞慢熱嘅靖甄居然咁住動~(￣▽￣)~*　又攬又錫
影完相仲唔捨得走，佢攬實mickey試圖賴死唔走
最後要勞煩兩位 "實Q" 拉佢走 (即係我同老公) "火羅" 爆(￣﹏￣)
之後同佢去玩旋轉木馬、小飛象....etc 機動遊戲

同時亦忙於搵靖甄嘅偶像合照(￣ˇ￣)

其實今日有好多地方都未玩過，唯有留待下一次再玩
下次打算晏少少去，因為想睇埋煙花 ~ 浪漫吓
臨走嘅時候，我哋批准靖甄自己柬一份禮物帶返屋企
靖甄企响商店度見到咁多琳瑯滿目嘅呃錢貨品(￣﹏￣)
攬咗好多好多個公仔，最終都係柬咗佢嘅知己 pooh pooh 帶返屋企
佢亦好乖，冇貪心要求我哋買多幾個 \(￣︶￣)>　
玩到大約5點半左右就起程回家，由迪士尼通往車站果段路
靖甄不停講『我好開心呀』加上夕陽斜照落我三口子身上
內心湧現一種筆墨難以形容嘅感受 ∩︿∩
我相信呢一種感覺應該係 "幸福" ♡♡♡♡♡

親子游泳班 (Round1) Lesson 3

日前：2010年5月16日(星期日)

靖甄今日唔肯上堂呀o(︶︿︶)o
今朝就好似平時一樣，食完早餐就同靖甄一齊準備d 游水用品，
各方面都好合作同好乖，臨出門口前仲用大人口吻催促我哋
『快d喇 ! 夠鐘嫁喇 !』(￣▽￣)"　
點知到達學校，正打算幫佢換衫，佢就開始嚟料，
不停講『我唔換衫、我唔游水，我哋返屋企』
起初我同老公都以為佢循例扭吓計，
我哋話『游完水帶你去公園玩、去圖書館、再食雪糕』
重金禮聘務求令佢肯游水，可惜最後都事與願違(￣.￣)
靖甄好堅決咁喊住講『我唔游水，我哋返屋企』 不停重複講呢句說話
老公望一望我，示意我應該出聲表態，我用強硬嘅語氣同靖甄講
『媽咪同爸爸都好失望，唔係因為你唔肯游水，而係你唔守承諾，
既然你唔想游水，我唔迫你，但你要聽住，你要為你唔守承諾而付出代價，
今日出街要自己行、唔准爸爸抱、返到屋企唔准睇 Mickey & Barney DVD、
今日冇得食任何零食。』我一口氣講晒所有條件，
自己都諗緊我用d咁深奧嘅字眼，靖甄會唔會明呢 ˇ﹏ˇ
最後靖甄望住我點頭，好堅定咁講『好! 我哋走啦』
我哋由富豪酒店步行去新城市，靖甄一粒聲都冇出，頭doudou 自己行
而爸爸就拖住靖甄一邊行一邊 "哦" 靖甄 ...... 煩死呀 o(≧o≦)o

今日靖甄變得好沈默，而佢亦一一遵守所有條件。
今晚去婆婆度食晚飯，平日EE 同佢玩電腦上youtube 聽歌，
佢一定好興奮，但今晚變得異常沉默。EE 同靖甄做乜?
靖甄答『甄甄唔開心....媽媽鬧、爸爸鬧』(╯_╰)

其實我都有為呢件事唔開心，唔係因為靖甄唔去游水
而係我會唔會太一廂情願去諗靖甄係鐘意游水呢 ?
我會唔會忽略咗佢嘅感受 ? 我係咪應該將心比己為佢諗吓呢 ?
其實今日我喺學校有一剎那想夾硬捉佢換衫，
但最後我都冇咁做，因為我要尊重佢，亦唔想佢對游水反感，
但經過呢件事，我幾欣賞靖甄呢份堅持，heheeee
正所謂希望在明天，希望呢個星期日會好轉喇 !

我的金飯碗 .... 冇咗喇

尋日收到新消息，按照總公司計劃，香港office 大可能明年中完全撤出。
兩、三年前日本股東睇準形勢，响越南河內大規模設廠，生意越做越好，
而我公司响上海蘇州 & 東莞虎門都有工場，
喺汰弱留強嘅情況底下，東莞工場亦响年頭陸續撤出。
其實boss 之前已經同我透露過有關政策，在商言商，
既然東莞廠都摺咗喇，留香港office 都冇用啦，
或者上年開始已經有晒思想準備，當時亦為呢件事唔開心咗一排
所以尋日聽到呢個消息一d都唔意外、亦冇唔開心，因為我有晒抗體 heheeee
喺呢間日資公司做咗9年，公司俾咗好多好多機會我
袋咗好多寶貴經驗落袋，無論人和事，
所學到嘅都令我一生受用，特別係我d 日文，一句講晒『賺凸』
至於日後有乜嘢打算，自己有一連串嘅計劃，亦有兩手準備，
如無意外我會嘗試做全職媽媽，因為靖甄今年9月返 pre-nursery，
面對呢個咁重要嘅轉捩點，自己亦希望可以有多d時間陪住佢，
我唔肯定自己能唔能夠勝任，但我會努力嘗試。
我亦好感激我老公，佢成日都同我講『你唔好擔心，安心做全職媽媽』
由心講，我真係唔想令老公有太大負擔 o(︶︿︶)o
不過，既然佢肯囉，我就即管嘆吓先 heheeee
但我相信揍女一定辛苦過返工囉，但我會做好呢份工 <(￣︶￣)>　

木糠布甸

終於完成我嘅心願喇 ! 我第一個自製嘅木糠布甸終於面世喇 !
heheee 仲整得好成功 tim ，連老公俾99分我 <(￣︶￣)>　
可惜最失敗嘅地方係.......胃食嘅我顧住食
而忘記將製成品影低 ≡(▔﹏▔)≡

☆★☆★☆★☆★☆★☆★☆★☆★☆★☆★☆★☆★☆★☆★☆★

材料 :
雲尼哪條1條  ( 取其籽 )
總統牌淡忌廉 (500ml)
煉奶 (按個人喜好調配分量)
雲尼哪糖 (1小包)
瑪莉餅 (120g)

步驟 :     
㊀ 先以攪拌機打碎瑪莉餅，備用。
㊁ 切開雲呢條，用小刀取其籽，備用。
㊂ 將忌廉打勻至軟（6 成企身），再拌入煉奶、雲呢哪籽及雲呢哪糖, 再打至 8 成企身 (好似軟雪糕狀)
㊃ 將瑪莉餅碎先鋪喺杯底，然後加上忌廉，如是者以「梅花間竹」的方法填滿，最後留面的是忌廉層。
㊄ 然後放入冰箱（freezer ) 或 雪櫃裡待雪硬

♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡♡

心得分享 :
我覺得淡忌廉要雪得夠凍，可以的話，先將撥忌廉嘅器皿放入 freezer 15分鐘，以避免淡忌廉撥極都係水。盡可能製作過程要快手d, 唔好做一part 又hea一陣，因為忌廉好快溶。
木糠布甸放入冰箱（freezer )雪，質感好似食雪糕咁，但最好食之前15分鐘先攤凍，
口感一流呀。o(≧o≦)o


下一個目標 ☞ Creme Brulee ∩﹏∩

親子游泳班 (Round 1) Lesson 2

日期 : 2010年5月9日 (星期日)

上星期上第一堂，靖甄喊足半堂，其後又會發展成點呢 ?
呢個星期，我、老公、婆婆不斷向靖甄提供游水後嘅心理輔導
得出結果係佢驚教練哥哥，但仍然希望再去學游水
好啦，既然係驚人唔驚水，我哋就再俾d耐性陪佢過度呢個適應期
今朝食過早餐後，我特別要求靖甄同我一齊執游水用品
唔洗講，一定係越幫越忙、越執越忟嫁喇o(≧v≦)o
但佢好enjoy呢一個環節，既然可以令佢有滿足感同開心
即使我嘔住血同佢執，我都覺得值得 heheee
撘車去學校果陣佢仲同我哋講『甄甄大個女嫁喇，游水時唔喊嫁喇』
我心諗『聽住先啦』(￣﹏￣)
去到學校，我同老公講『我去confirm吓今日邊一組先』
正想講多句果陣，大家都聽到地下傳出一陣陣喊聲
我哋往下一望 ! 嘩! 原來我個女喊緊(⊙＿⊙)　
望見靖甄咁，我同老公都忍唔住笑咗出嚟(O ^ ~ ^ O)
我抱起佢問佢做乜喊，佢話『我驚哥哥，我要返屋企』
我話『今日唔係哥哥喇! 今日係姐姐呀』佢有少少疑惑咁望住我，
我話『你試吓同姐姐玩一陣，如果你真係唔鐘意，先返屋企喇』
佢跟我口水尾講『甄甄玩一陣喇，玩一陣就返屋企』
就係咁我就賣咗靖甄豬仔喇<(￣︶￣)>

經過上一堂嘅經驗，我叫老公同教練講聲
希望教練初步唔好同靖甄有太近距離接觸
因為靖甄超怕羞、又怕同陌生人接觸，佢需要較長嘅時間觀察
幸好佢今日只係喊咗10分鐘，其餘時間都見佢玩得好開心
比上次放膽咗玩，我諗絕大原因係因為今次個教練係姐姐<(￣︶￣)>
今日靖甄初初落水果陣都喊住叫媽媽....講真, 都幾心痛嫁，
果一刻不停問自己我係咪唔應該俾靖甄咁早去學游水呢 ?
都有少少自責嫁 o(︶︿︶)o  幸好老公反而安慰我，
佢話亞女性格係怕差同慢熱，需要較長嘅時間去適應，
但始終都要俾佢面對呢d問題。
話時話今次我好感激老公，因為我唔識游水，
所以陪靖甄參加親子班嘅重任就交俾佢，辛苦晒喇 爸爸♡

希望嚟緊上第三堂，靖甄可以唔喊喇 ! ∩﹏∩

親子游泳班 (Round 1) Lesson 1

親子游泳班 (Round 1) Lesson 1
日期 : 2010年5月2日 (星期日)

今日係靖甄上親子游泳班第一堂，
前一晚我已經同老公講要有思想準備靖甄會喊，
老公反而好老定話 " 佢咁鐘意玩水， 加上我又陪佢，一定唔會喊 "
但我嘅第六感始終覺得 " 一定唔會咁簡單 "
今朝靖甄出奇地合作，由起身梳洗、食早餐、換衫都冇扭計，
不停講『我今日要游水嫁喇』d口吻十足十大人咁。
去到呂明才小學，入到學校門口靖甄已經好興奮，
我去到接待處搞埋d手續之後，就帶靖甄入去換衫，
個toilet又濕又臭又焗(￣▽￣)"　真係好鬼難頂
著好泳衣之後，單憑靖甄行去泳池嘅步伐
我 feel 到佢好驚 ≡(▔﹏▔)≡ 我裝作好輕鬆咁同佢講
" 嘩! 好似好好玩喎! 你睇吓d哥哥姐姐玩得幾開心 "
果一刻我見到佢雙眼已通紅，眼淚已經 "啷吓啷吓"
跟住爸爸抱住靖甄入泳池，當日嘅代課教練好熱情咁上前同靖甄打招呼
仲好殷勤咁幫靖甄戴泳帽o(︶︿︶)o
呢一連串嘅行為已經足夠嚇怕呢隻膽小鬼
第一堂嘅序幕就喺哭聲中開始T__T ，60分鐘裡，靖甄喊咗半堂，
佢嘅喊聲淒厲到連隔籬line上緊堂嘅小朋友、教練，
甚至救生員都異口同聲同佢講 " 乖啦，唔好喊啦，唔洗驚，大家一齊玩啦 "
hahaaa.... 最搞笑係嗰位教練，見佢不停地攞咗好多玩具俾靖甄玩
最後，亞sir 拎咗成桶波出嚟，靖甄見到咁多彩色波波浮响水
即時收晒聲，仲放膽自己行去玩，餘下果30分鐘，見到靖甄仲玩得好開心tim
大家總算輕一口氣『辛苦晒啦, 爸爸! 辛苦晒啦, 亞 sir !』 o(︶︿︶)o