回到童年時 - 三角朱古力蛋糕

近兩個星期，肥仔同事响 office 不斷釋放負能量而大大影響我嘅情緒
尋日放工覺得好鬼肚餓，又加上心情唔好，突然覺得自己好淒涼.......
見時間尚早，中途响九龍塘落車，食我兒時最愛嘅 " 三角朱古力蛋糕 "
" 三角朱古力蛋糕 " 宜家真係買少見少，
幾年前俾我發現九龍塘火車站嘅 "君蘭餅店" 仲有得賣，好感恩呀 !
每次食三角朱古力蛋糕都嗒得出屬於我兒時嘅回憶，
我記得小學果陣，返上午校嘅我，媽媽每朝早帶我返學之前，
佢會同我去面包舖買面包作為我小息時食用嘅小點，
每當媽媽問我想食乜嘢包，我嘅答案永遠係「菠蘿包、豬仔包、雞尾包」
問心....我最想食就係三角朱古力蛋糕
當時企屋環境唔係咁好，印象中菠蘿包、豬仔包、雞尾包係 $0.60，
而 "三角朱古力蛋糕" 好似係 $1.00 or $1.20
所以一星期只可以食1次 三角朱古力蛋糕
話時話當時我都幾識諗嫁 heheee
而媽媽總會叮囑我『件蛋糕放入書包前面果格，咁就唔好壓到變屎餅』
到呢一刻呢一番說話我仍然記憶猶新

呢件值 $4.20 嘅蛋糕令我起死回生，亦導出箇中道理
『簡單、平凡就是福』