靖甄在醫院裡的日子

2009年12月31日 (星期四)

凌晨四點撻落床, 六點鐘鬧鐘響咗
一起身已經感覺到自己狀態唔多掂
下意識地衝入toilet ...... 嘔
唔通俾靖甄傳染倒 ?
毫無體力嘅我, 唯有用意志撐住
不斷同自己講『無事嘅, 係幻覺』
梳洗過後打算出門之際
又嘔多一鑊..... 唉
抖咗一陣再勉勵自己三聲 "加油"
龜速地出門口

去到醫院，我細細聲咁打開門
見到爸爸坐响靖甄身邊
前晚嘅煎熬令靖甄落晒形
但仍然用佢嘅招牌笑容對我笑, 叫我一聲媽媽
老公話靖甄尋晚只係嘔咗一次
但d護士成日入嚟check佢, 搞到佢冇覺好瞓
之後我叫老公返去梳洗
而我就刻意唔講我唔舒服
因為唔想佢又要擔心多一個

九點左右，媽媽同老公分別到醫院
或者我面色真係好難睇, 佢哋估到我唔舒服
叫我快d返屋企睇醫生同休息
但咁早診所又未開, 我索性返屋企休息 zzzzzzz
瞓咗兩粒鐘... 依然覺得好唔舒服
但我一定要起身煲白粥俾靖甄食
嘩, 由睡房行去廚房果條路就好似長城咁長
辛苦到忍唔住喊咗出嚟

去到醫院已經中午十二點半
老公話今朝醫生同靖甄檢查
話佢有輕微發燒, 情況尚算理想
因為暫時唔可以食固體食物嘅關係
仍需要吊鹽水 , 而靖甄嘅心情就好差，
郁d就喊, 成日都話要落床......
我唯有幫佢推住落吊鹽水嘅 "嫁餐" 陪佢周圍行
靖甄落地第一時間就係走出去走廊攞圖書睇
最搞笑係佢吊鹽水果隻手嘅手掌用咗塊板嚟固定位置
佢就成日扮聽電話不停講『喂! 喂! 喂! 喺邊呀? 』
婆婆話俾佢笑死

直至4點左右，醫生話可以嘗試唔需要吊鹽水
安全起見勸我哋聽朝先好出院
估唔到我哋一家人要喺醫院度食除夕晚飯
而靖甄都開始肯食嘢, 大約7:30pm
老公已經催促我返屋企, 佢叫我早d休息
正因為今曰係除夕夜, 我好想留耐d
但老公話我哋要好好休息, 唔可以病倒
我哋要留住條命照顧靖甄

回家時, 沿路上好熱鬧，但我就好寂寞
個個都開開心心去慶祝、去count down
而我就得自己一個.............
我唔想再嘗試呢種滋味