靖甄在醫院的第一天

2009年12月30日 (星期三)

眼見靖甄嘔得咁辛苦
所以決定帶佢入醫院
"拿拿林" 拎針卡、執咗d日用品、衫仔
去到仁安醫院嘅晚間急証門診
我仲以為司機大佬車咗我去威爾斯(⊙＿⊙)　
做乜咁Q多人(￣▽￣)"　

可能護士見到靖甄情況比較嚴重
安排我哋輪候緊急病症果條line
等咗30分鐘左右就有得見醫生
醫生check過後
話聽到靖甄d腸郁得好厲害
加上又不停咁嘔
已經開始嚴重脫水
要立刻安排入院觀察 & 吊鹽水

當晚算好彩, 兒科病房剩返一張兩人病房嘅床位
辦好入院手續後上到7樓
兒科醫生已經等緊我哋
嚴醫生好nice 好好人
靖甄亦好叻冇喊到
之後護士話要幫靖甄抽血 & 吊鹽水
靖甄瞓响張床後 , 叫我同老公幫手 "禁" 住靖甄
可惜試咗一次結果失敗咗
護士話因為靖甄d血管太幼, 加上缺水
佢話唔想再試又失敗
所以call 返嚴醫生嚟幫靖甄抽血 & 吊鹽水
可能嚴醫生怕我接受唔到
佢叫我响出面等, 老公就留低
企响門外等真係一秒一驚心
過一秒就好似一個鐘咁耐
15分鐘後..... 爸爸抱住靖甄出嚟
靖甄一邊喊一邊同醫生講
『唔該晒 bye bye』o(︶︿︶)o
醫生同護士都俾佢呢返說話引到大笑

入到病房已經凌晨1點
因為另一張床嘅小朋友係爸爸陪瞓
所以留守喺醫院陪瞓嘅責任要交俾老公
而我等到靖甄瞓著咗先返屋企
返到屋企已經凌晨兩點半
沖涼後瞓响張床度突然覺得好陌生
身邊冇咗靖甄、冇咗老公一齊瞓
好可怕好可怕 Σ( ° △ °)︴