校園生活 (Pre-Nursery) - 適應週第三天

日期：2010年9月3日 (星期五)

今日係適應期第三日，亦代表返學嘅蜜月期即將結束，惡夢即將來臨o(︶︿︶)o
靖甄今日入到班房，嘗試搵返佢個locker 放低書包再返回坐位，而我都盡量唔幫佢，希望佢可以學懂要照顧自己。佢亦開始了解、明白每一時段要做d乜。今日學校安排咗親子做勞作，用紙袋做咗一個 bear bear ！完成作品後靖甄雙手遞個 bear bear 俾我，話「媽媽送俾你」。唉 ! 篤中我死穴(￣﹏￣) 即時同自己講「唔好咁樣衰，唔好喊，要忍住要忍住」。
今日時間過得特別快，連我都好唔捨得，放學前靖甄同我講「係唔係要走啦 ? 我唔要返屋企」(⊙＿⊙)，隔籬同學仔嘅媽媽聽到都不禁大笑。我心諗 …. 「靖甄，下星期冇人陪你上堂，你就知味道。」 ╮(╯3╰)╭　

靖甄是日表現：好開心、開始投入校園生活。

校園生活( Pre-Nursery) - 適應週第二天

日期：2010年9月2日 (星期四)

經過尋日嘅開學日，靖甄最緊張嘅就係佢個書包(￣﹏￣) 尋晚佢居然要求要攬住個書包瞓覺，佢話好驚爸爸會用佢個書包喎(￣ˇ￣)
今朝一早起身，飲完奶之後靖甄已經急不及待自己執書包，仲話要換校服(￣.￣)，不停叮囑我「媽媽記住九龍塘等，同我一齊返學」。
今日班房明顯比尋日寧靜得多，因為今日只可以由一位家長陪上堂。原本一班28人，今日分開兩組(一組14人) 分兩個時段上堂，由4位老師負責，感覺上安排得幾好。原來進行每一項目都用簡單嘅兒歌代替說話，例如會一邊唱歌一邊收拾玩具、向老師小朋友打招呼會唱午安歌、報告天氣又會唱歌 …… 等等，完完全全係靖甄杯茶。而靖甄當然最鐘意排厠呢個環節，成班小朋友一齊唱「一步一步寶寶愛踏步，一步一步寶寶愛踏步」，列排扮火車踏步去洗手間。茶點時段就成班小朋友一齊祈禱，明顯地呢班小朋友係嬌生慣養，個個自己食嘢嗰陣都手忙腳亂，倫倫盡盡，場面好搞笑。今日茶點係蛋糕仔，靖甄問我「點解冇cream?」(￣▽￣)" 原本唔多想食件蛋糕嘅靖甄，見到老師揸住成堆汽球，老師話要食完茶點飲完水水，收拾好用具，再攞返自己嘅書包乖乖哋坐好就可以帶一個汽球返屋企。靖甄叮時雙眼發光，turbo 做晒老師嘅要求(╯3╰) 小朋友要求真係簡單。快樂嘅一小時咁就完結喇 ! <(￣︶￣)>　

靖甄是日表現：好開心、返屋企不停唱「寶寶愛踏步」呢首歌 ♬♪ ♩♭♫

校園生活(Pre-Nursery) – 開學日

半年前開始，已向靖甄灌輸有關返學嘅基本概念，所以佢對返學嘅感覺大致上都幾正面。成日都同我哋講「我9月返學喇 ……」真係話咁快就到喇。原本爸爸打算今日請假陪佢返學，但我拒絕老公呢份心意，因為如果老公响現場反而會令靖甄更加依賴。因為平日帶靖甄返學放學都係婆婆，我想靖甄能夠明白呢種模式，要乖乖哋著整齊嘅校服、要自己預備濕毛巾、手巾、水杯 …… 等等，藉此訓練佢嘅自理能力，唔可以假手於人。
第一日開學返1個鐘 (可由家長陪同)，約咗婆婆响九龍塘火車站等。第一眼見到靖甄著住整齊嘅校服再扎咗兩條孖辮，好感動好感動 …… 非筆墨能形容。靖甄好乖，全程自己行，冇要求我哋抱，仲提醒我哋要小心睇車。
入到課室，有三位老師向靖甄自我介紹，靖甄亦禮貌地逐一打招呼。然後班主任周老師送咗個書包俾靖甄，靖甄開心到好似執到金咁。然後再帶靖甄返回佢自己個位。之後靖甄亦好唔客氣咁攞玩具玩，攞圖書睇。陸陸續續有其他同學仔入課室，一部份表現得好鎮定，有d就喊得好淒涼，有d連課室都唔肯入，靖甄好好奇四周圍望，仲問我「點解d小朋友喊 ?」、「要唔要拎紙巾俾佢哋抺眼淚?」。

一班有28人，但今日課室連埋家長、老師、家傭等等一共百Q幾人，老實講……好嘈好煩，就係咁，開學日就响呢種混亂嘅情況下揭開序幕 ……
靖甄是日表現：冇喊、好開心、仲表示要繼續返學。

我的低能生活 - 殺死感冒菌 !

7月份因為感冒菌發作開始間歇性地病(︶︿︶)，好返一排又再病過。身體差、精神差而令我心情惡劣，可惡嘅感冒菌完完全全打擾我日常生活(≧o≦)。經過個半月食西藥嘅煎熬，我決定投中棄西，食返幾劑中藥保命(￣.￣)。

經盧醫師打完眽，確實係感冒菌未清同埋困熱，係 ! 呢輪真係燥到爆，心情好煩躁，特別係朝早瞓醒果吓，頭重腳重、攰到好似冇瞓過咁(￣﹏￣)…. 辛苦到死。身體好嗰陣，瞓醒伸個懶腰已經load著部機，呢輪就要花兩個鐘先 load 著，魂魄先至歸位。好彩 ! 食咗兩劑藥 (今次要食4劑 ) 已經渾身是勁，心情亦好咗好多，仲溫柔咗 ! 最重要嘅係老公同靖甄亦係由受害者”升呢”成受惠者。<(￣︶￣)>　

玩具篇 - 交通工具

“買錯玩具教錯仔” 書中嘅作者提到，小朋友其實比較鍾意玩d現實生活中能夠接觸到嘅物件，但大部份家長⊙﹏⊙(包括我) 會好主觀地選擇一d以卡通人物為主題嘅玩具俾小朋友。

上星期六同靖甄去旺角睇醫生，見佢咁乖就破例一次帶佢去買玩具。今次係佢第一次去玩具舖可以帶佢心愛嘅玩具返屋企。事前同佢講好今次買玩具嘅題目係「交通工具」其他就一律唔買。佢好乖，我知佢睇中咗套煮飯仔，但佢都好守承諾，一邊摸住套煮飯仔一邊話「摸摸就得，唔買嫁」。一家三口响玩具舖搜尋「交通工具」，過程真係好開心，靖甄不停搵不停講「睇吓 ! firetrack 呀」、「嘩 ! 巴士呀」最後 total 買咗6樣，但美中不足係買唔到靖甄心愛嘅火車 & 飛機(╯_╰)。愛女心切嘅爸爸唔想靖甄失望，見到 thomas有一套火車幾靚，同靖甄講不如買呢套啦，但靖甄居然話「呢個係 thomas，我要買坐返屋企嗰個火車，爸爸你擺返好佢啦，整爛咗叔叔會鬧」(⊙▽⊙)"

今次呢6樣「交通工具」都幾好，最主要係玩具標明係「香港交通工具」，都有8、9成相似。價錢亦算合理<(￣︶￣)> $18.00 一件。

                        

                        

打工仔的日子 - 探班

長島さん嘅老婆美佳さん 間唔中會上嚟探班，但佢多數趁佢老公出trip先鼠上嚟，閒話家常之餘當然順便收吓風，check吓佢老公有冇好似我佬細咁有外遇(╯3╰)

日本人嘅禮儀有幾好已經不容置疑，今日美佳さん好有心買咗 Pen記 (Peninsula) 嘅芒果布甸<(￣︶￣)> 同時令日本水果もも(水蜜桃) 。
講真Pen記嘅芒果布甸真係好得(￣ˇ￣)，
但果對桃呢…. 就…. 真係嘛嘛 (￣﹏￣)。

一顆置業的心♡

自從經歷過搬屋呢場浩劫之後，兩公婆萌起一顆置業的心♡ ，其實老公都好積極了解&關注我哋心儀嘅屋苑價格，但現階段樓價水平高得有d失控，而嫁入市就必定踩屎(╯3╰)，寧可暫時揸住舊錢靜待時機。
最近，與書無緣嘅老公 (佢一睇書就好易瞓著) (￣▽￣)"　居然好落力刨緊呢本書，佢話想佢屋企嗰兩條queen (我同靖甄) 能夠過d安樂穩定嘅日子.... 超感動呢 <(￣︶￣)>　

PRE-NURSERY 準備篇㊁

日期 : 2010年8月14日 (星期六)

因應校方要求每一個學生要由醫生填寫一份「健康紀錄表」。今日出旺角搵返靖甄睇開嗰位兒科醫生幫佢 bodycheck，順便幫佢打埋「甲型肝炎」預防針。

事前已經同靖甄講解今日去睇醫生嘅目的，佢聽到要打針當然好抗拒啦(︶︿︶) 大滴大滴眼淚話唔打針唔睇醫生。
(▔﹏▔)但我同佢講「因為你9月要返學，學校唔俾有蟲蟲嘅小朋友返學，所以醫生叔叔要幫靖甄打針，咁就冇咁易病，同埋今次唔洗食藥」靖甄聽到唔洗食藥，叮時收晒聲╮(╯3╰)╭　

為咗安撫靖甄不安情緒，因應靖甄嘅要求今朝帶佢去飲茶，食佢心愛嘅叉燒酥 &流沙飽。佢亦好乖肯遵守承諾冇扭計話唔去診所，去到診所我叫佢拎張針卡俾姑娘登記。入到醫生房，佢遞咗張「健康紀錄表」俾蕭醫生仲同佢講「我要返學，你可唔可以幫我寫寫、幫我打針。」check完一輪到戲肉...... 打針(￣▽￣)"　蕭醫生眼明手快、3秒過後靖甄慘叫一聲，喊住問「係咪可以返學喇?」wakakaaaa 醫生、姑娘、老公同我都俾佢笑死(￣ˇ￣)

PRE-NURSERY 準備篇㊀

日期 : 2010年8月7日 (星期六)


最近忙於為靖甄返pre-nursery 而準備好多嘢，今日特別帶埋靖甄返學校攞校服，順便recall返佢對呢間幼稚園嘅印象。上年in咗三間幼稚園，三間幼稚園當中，靖甄對啟思印象最深刻。
今日入到門口佢已經話「媽媽嗰度有大巴士、有大魚池、有車車玩 ……你記唔記得呀」，我話「當然記得喇 ! 返學真係好開心呀，咁多嘢玩」，靖甄大力點頭和應「好開心嫁 ! 我9月返學啦」

去到接待處攞校服，之前訂落嘅size 已經唔啱喇，(￣﹏￣)唯有兩星期後再嚟攞校服啦。自己心裡不禁低能地暗喜貪笑「我個女真係快高長大 」<(￣︶￣)>　

人生曙光

幾個月前因為工作上面臨危機而擔憂咗一段日子╮(╯_╰)╭ ，後生時失戀總會聽吓情歌應吓景…..　咁失業又可以聽d乜嘢歌呢？ (⊙＿⊙)“R”爆頭呢 ? 我會推介你聽陳奕迅嘅『陀飛輛』。嗰段期間我反反覆覆聽住呢首歌，我夠膽講我已經徹底消化歌詞嘅含意，我覺悟到自己應該用乜嘢態度面對我嘅人生，令我餘生變得更加精彩<(￣︶￣)/　　


喺年輕嘅時候，可以因為夢想而去奮鬥，因為你覺得仲有大把青春、大把時間、總之有gutsy就有理冇理向前衝。

到咗中年，就到因為現實為錢而奮鬥，為生活、為物質、為名譽、為地位而拼命，人人都想用最短時間、付出最少勞力嚟換取最多財富同榮耀。自問自己亦係咁，現實嘅社會就係咁，你慢人一秒出手就隨時連機會都冇埋。幸慶自己得到嘅、擁有嘅嘢分量啱啱好，免除好多不必要嘅煩惱，細胞都死少d。

直到老年臨終時先發現，用咗大半生所追求嘅嘢，即使俾你得到那又如何 ???? 能夠帶走嘅又有幾多 ???? 種種嘅遺憾，或會不禁問自己『人生….是浪費了嗎?』

如果冇今次嘅危機，或者我都唔會真真正正停低，用時間去思考一d我一直唔認為係問題嘅問題 ….. 有時候面對突然其來嘅轉變或有不如意嘅事發生，原來唔係想像中咁可怕，假如你選擇勇敢面對&從多角度去分析，你會發展有一線曙光從遠處向你揮手。

我已經望到呢一線曙光(￣ˇ￣)，希望今次唔係因為反光而產生嘅幻覺啦 ! (￣﹏￣)

我們這一代 - Keith

J小姐尋日打電話俾我吐苦水，佢話佢10歲嘅仔仔要轉校，係迫於無奈地轉校。講真，我唔係黑心，我聽到呢個消息反而暗地裡替 keith(佢個仔仔) 而高興。Keith 就讀某間國際小學，呢個小朋友本身有少少弱聽，望子成龍嘅J小姐亦不惜一切安排keith 入呢間學校，由於keith 有弱聽，所以喺學習方面比其他同學較為吃力，某程度上因為咁，校內嘅成績亦強差人意。從J小姐口中得知，keith 而從升上4年班，成日都話唔上返學，唔鍾意呢個班主任。因為呢位班主任經常公開咁批評keith 嘅成績& 操行。加上老師已經標籤keith為「問題學生」，keith 慘遭班裡嘅同學仔杯葛。真係好難想像一個10歲嘅小朋友點樣喺去呢種人間地獄生存。6月尾學校派發成績表，班主任對 keith 嘅評語非常差，校方亦建議 J小姐應該替 keith 轉校。呢件事對keith 打擊好大，情緒好唔穩定。聽J小姐講最近keith嘅班主任曾當眾喺全班同學面前狠心鬧 keith係垃圾 ...... 為人師表居然可以咁樣欺凌一個手無寸鐵嘅小朋友，一句“垃圾”足以擊倒一個小朋友嘅自專心，枉佢讀飽聖言詩書，真係不知所謂.......
上星期J小姐經教友介紹，帶咗keith 去睇心理醫生。已評估keith 係屬於ADHD (專注力不足)，學校生活所遇到嘅問題令佢失去自我價值、冇自信，同時有少少自殺傾向。Omg !!! 心理醫生嚴重警告J小姐要立即幫keith 轉校，可以的話唔好再俾佢返宜家讀緊嗰間學校。之後介紹咗兩間小學俾佢，專門收d類似keith嘅小朋友，聽講呢兩間小學嘅老師好有愛心，校裡有好多社工跟進及輔導有關嘅學生。另一方面 keith 亦開始接受藥物治療及心理輔導，幸好醫生話keith嘅情況唔算太嚴重，仲同J小姐講接受藥物治療後短期內會發現keith會明顯地乖咗，再配合各方面輔導，有信心keith一定可以康復。我完全幻想到keith頭頂已露出一線曙光。

Keith，加油呀！好希望好希望你好快可以親手劃一道真正屬於自己嘅彩虹，可以好自信咁同我講“這世界真美好”♡♡♡

病菌家訪

(╯_╰) 踏入7月份，我們這一家被惡毒嘅細菌兵團家訪，一家三口無一幸免。帶菌者係....... 我 (⊙＿⊙)　再傳染俾老公，小女靖甄亦難逃一劫，個個都係「上呼吸道感染」。
幸好我哋及時採取應變措施，爸爸第二日見有輕微喉嚨痛已經不敢怠慢即刻睇醫生，所以佢用咗兩日時間已經康復。
第三日見到靖甄有兩聲咳，我就即刻帶佢睇醫生，睇開嗰位兒科醫生讚我明智，因為靖甄已經有「上呼吸感染」嘅徵狀，幸好食咗三日藥而經好返晒。
而我嘅康復進度就冇以上兩位受害者咁理想，睇咗兩次醫生，第一次嗰位醫生....講起就火滾
o(≧o≦)o 嗰D group medical 嘅醫生..... 簡直不知所謂、毫無醫德，講真你受得保險公司嘅就預咗我哋嚟睇，個死人醫生象徵式幫我檢查之餘，仲求求其其俾兩包藥打發我走，你賺少錢都唔應該搵我哋d病人 "較非" 呀大佬 !@#%$^&&* 見病情冇好轉，索性轉睇靖甄睇開嗰位兒科醫生，三十幾歲人學人睇兒科醫生 (￣▽￣)"　醫生話我都幾嚴重，俾咗兩隻特效抗生素俾我，六包藥一支加一支藥水 (我朋友講笑話係六餸一湯) 。醫生叮囑我一定要食晒d抗生素，佢仲話如果唔掂下次要改藥食類固醇︽⊙＿⊙︽　真係俾佢嚇鬼死我。食咗幾日藥，已經康復六、七成，呢 $380.00 總算冇洗錯 ! <(￣︶￣)>　

玩具篇 - 多功能擦膠

剛剛嘅星期日，幾位媽媽級嘅朋友搞咗個聚會，
地點係Owen仔屋企。
假如要我形容Owen仔屋企......
我覺得係袖珍版嘅『玩具反斗城』，
如果我係小朋友，我一定會玩到唔捨得走。
數吓手指，我已經半年冇買過玩具俾靖甄喇，

係時候要搜尋一d玩具俾佢，

但講到買玩具(￣▽￣)"　呢一瓣實在令我好頭痛，

因為太多顧慮o(≧v≦)o

又要價錢合理、品質安全、有啟發性......

最重要嘅係......唔好「阻掟」(￣﹏￣)

剛好最近我睇緊一本書叫「買錯玩具教錯仔」，
呢本書值得推介俾大家，
真係幫到我呢類十吓十吓嘅媽媽●﹏●
今次推介就係呢幾款多功能擦膠，
賣相吸引之餘，仲好似真嘅一樣，
每件擦膠可以拆開再任意組合，

最重要係「日本製です !」

相信品質都唔會差得去邊。

書裡面話，藉住呢種玩意，可以變出幾項用途

1 ) 數數

2 ) 分類

3 ) 認知

4 ) 鍛鍊小手肌肉

5 ) 想像力

6 ) 外語能力

7 ) 各地飲食文化

我估靖甄應該幾鐘意，因為佢好鐘意玩煮飯仔！

「肥甄廚房」開壇啦<(￣︶￣)>